Праходзіў ён у два этапы. У завочным этапе “Партфоліа ўдзельніка” журы пазнаёмілася з асабістымі дасягненнямі школьнікаў. У фінале хлопчыкі і дзяўчынкі прынялі ўдзел у інтэлектуальным конкурсе аратарскага майстэрства “Моладзь усхваляе родны край” і ў творчым — “Візітная картка”.
У складзе журы прысутнічалі: начальнік аддзела адукацыі, спорту і турызму Уладзімір Казючыц, яго намеснік Вольга Лычкоўская, загадчыца вучэбна-метадычнага кабінета Нона Свідзер, вядучы спецыяліст аддзела адукацыі, спорту і турызму Вольга Казак, першы сакратар РК ГА БРСМ Юлія Зяневіч і метадыст вучэбна-метадычнага кабінета Алена Шыманская.
Дзяўчаты і хлопцы выходзілі на сцэну, а вядучыя расказвалі пра іх захапленні. Усе яны актыўныя, мэтанакіраваныя і творчыя асобы. Гэта яшчэ раз пацвердзіў конкурс “Візітная картка”. Некаторыя дэкламавалі вершы пра сябе і сваю сям’ю, школу і свае захапленні. Іх расказы суправаджаліся слайд-фільмамі, музычнымі нумарамі. Многім дапамагалі паказваць “візіткі” аднакласнікі. Кожнае выступленне было па-свойму арыгінальным і непаўторным. Уразіла ўсіх візітная картка В. Валовіка, які расказаў пра сябе і сваю сям’ю ў стылі казкі.
За тры гадзіны, на працягу якіх цягнуўся конкурс “Вучань года-2015”, на сцэне гімназіі зіхацела восем зорачак: Ілья Лойка (Дзешчанскі дзіцячы сад-СШ), Надзея Вішнеўская (СШ № 2 імя К. Крапівы), Ніна Храноўская (Нёманская СШ імя І. Гурскага), Юлія Кукса (Хатлянская СШ), Вячаслаў Валовік (гімназія), Ірына Крывашэя (СШ № 1 імя А. Пушкіна), Дар’я Малашка (Азерская СШ), Алена Атраш (Ліцвянскі дзіцячы сад-БШ).
Пакуль журы падлічвала балы, гледачы не сумавалі – для іх выступалі вучні і настаўнікі гімназіі.
Выбраць лепшага было складана. Рашэннем журы вучнем года стаў Вячаслаў Валовік. Дыпломамі аддзела адукацыі, спорту і турызму райвыканкама адзначаны ўсе ўдзельнікі конкурсу. У намінацыі “Лідар” перамагла Ірына Крывашэя, у намінацыі “Інтэлектуал” – Ніна Храноўская. Дар’я Малашка адзначана ў намінацыі “Дасягненні”. Спецыяльны прыз ад РК ГА БРСМ за патрыятызм і вернасць сямейным традыцыям атрымаў Ілья Лойка.
Таксама былі ўзнагароджаны вучні, якія прынялі ўдзел у раённых алімпіядах.
НА ЗДЫМКАХ: пераможца конкурсу Вячаслаў ВАЛОВІК; удзельнікам конкурсу — падарункі і дыпломы.
